قبل كل شئ لازم نعرفكم ان القصه دى منقوله من احد المنتديات
"الحلقة الأولى"
كان ياما كان .. اتنين عيال صغيرين صحاب انتيخ ..
الأولاني اسمه (سعد) عنده 11 سنه ونص ..
والتاني اسمه (جاد) عنده 11 سنه …………… بس
وفي مره من المرات ..
-- و قيل المراريت .. و المرارير .. و المراير --
كان (سعد) قاعد على عتبه بيتهم .. مستني أي حد في الشارع عشان يبرشت عليه .. لحاد ما جاله (جاد) وهو بيجري ومتنرفز قوي قوي ..
جاد: قوم يا سعد .. قوم .. بسرعه
سعد: عايز ايه ياد ؟؟ في حاجه ؟؟؟
جاد:قوم بسرعه .. مش فاضيين
سعد: في ايه ياد ؟؟ حد من صحابنا اتخانق ؟؟
-- قال يعني (سعد) ولا (جاد) ليهم في الخناقات.....دول بيتضربو ضرب!!!!
جاد: انا قررت خلاص .. و قراري ده نهائي
سعد: قرارك مين ؟؟ نهائي؟؟!!!! --الواد ده بيتفرج على افلام اجنبي!!!
جاد:سعد .. انا مسافر بلاد بره
سعد:ياللا ياااااااد من هنا
جاد:انا بتكلم جد يا سعد
و قام (سعد) عشان يشم بق الواد (جاد) .. يمكن كان قاعد مع الواد (غيبوبه) و خلى (جاد) يشرب دوا كحه .. ولا يبلبع برشامتين صراصير
جاد: انت بتعمل ايه يا سعد ؟؟
سعد: باشوفك .. مش يمكن ضارب حاجه
جاد: يا سعد انا في كامل قواي العقليه
سعد:...................... ؟؟
--الواد ده من ساعه ابن خالته ما جاب دش وهو بيقول كلام كبير قوي.
جاد: سعد .. بذمتك مانفسكش تشوف بلاد بره ؟؟؟
سعد: مش لما نشوف بلاد جوه
جاد: يا سعد .. انا عايز اشوف بلاد بره اللي قلبو دماغنا بيها
سعد: بلاد بره ايه ياااد ؟؟ انت ابعد مكان رحته كان (جمصه) مع عمتك الصيف اللي فات .. و تهت منهم لما راحو (بلطيم)
جاد: سعد .. انت ياد عيّل .. و مالكش في الصياعه
سعد: انا أصيع منك و من عشره زيك .. طب ايه رأيك بقى عشان بتغلط فيه .. هاتجيب نص جنيه
جاد: وعايز النص جنيه ليه بقى ؟؟
سعد: هاجيب سيجارتين فرط .. و لبانه .. و مشط كبريت -- صياعه مبكره
جاد: بقولك ايه .. انا مش ناقصك .. هاتيجي معايه ولا اروح لوحدي ؟؟
سعد: تروح لوحدك فين يااااد ؟؟ انت فاكر انك هاتكت من المدرسه وتقعد على القهوه و تروح بيتكم لما المدرسه تخلص ؟؟
جاد: سعد .. انا مش بهزر
سعد: بقولك ايه ياد انت .. زي ماللصبر حدود .. العبط هو كمان ليه حدود
-- اسم الله عليك انت يا أذكى إخواتك
جاد: عبط ليه ياابني .. انا عامل حساب كل حاجه
سعد: خلليني معاك .. مش السفر محتاج فلوس !!! و محتاج لغه كمان .. و بعدين انت ما بتعرفش عربي اصلا .. انت آخرك تتفرج عالصور في الجرايد .. و كمان بتشوفها بالمقلوب
جاد: مش كل اللي سافرو كان معاهم لغه .. و الفلوس مقدور عليها .. هناخد قرض من البنك و نرجعه بعدين
سعد: انت هتعمللي فيها جاد ابو الفتوح ؟؟ تاخد قرض ازاي و هترجعه منين ؟؟؟ ده انت امك بتخيط فساتين لجيرانها شكك .. و ابوك ميكانيكي غبي .. ماعندوش في الورشه غير عربيتين فيات قرده .. بيصلح فيهم من ساعه ما اتولد .. و شكله قلبهم تلاجه بيبس
جاد: يا سعد طاوعني و مالكش دعوه بأي حاجه
سعد: ياللا ياد من هنا .. هنرش ميه
جاد: ماشي .. ماشي يا سعد
ومضى (جاد)لحال سبيله .. و(سعد) لسه قاعد على عتبه بيتهم مستنى أي حد معدي في الشارع عشان يصطبح و يبرشط عليه.
وتمر الأيام ........
و تعدي الأيام .......
و تفوت الأيام ......
-- لحاد الصيف ما جه
____ يتبع ____
موضوع: سعد وجاد خارج البلاد 
الجمعة مارس 21, 2008 1:43 pm
